Ada satu carita bae yang Markus tulis deng hati manyala-manyala, deng sonde mau tahan-tahan ko kasi tau orang. [Lia samua tampa di Injil Markus di Peta 1, di balakang]
Sapa yang tulis? Kapan? Deng di mana?
Dalam tulisan asli, sonde subu sapa yang tulis ini buku. Ma iko gareja pung tradisi mulai dari abad kadua, ada pamimpin gareja yang catat, bilang, Markus yang tulis ini buku iko Petrus pung carita. Markus pung nama laen, andia Yohanis Markus (Utusan dong pung Carita 13:13). Dia sonde maso dalam Tuhan Yesus pung ana bua 12 orang.
Iko orang yang pintar dong, Tuhan Yesus pung Carita Bae iko Markus ni, jadi injil yang muncul lebe dolu dari injil yang laen dong (kira-kira antara taon 55-65M). Injil Markus ni, injil yang paling pende. Iko tradisi gareja, Markus tulis dia pung injil di kota Roma.
Akurang ko Markus tulis ini buku?
Dia pung konci ada di ayat partama (1:1). Markus mau kasi tunju bukti, bilang, Yesus tu, bukan manusia biasa sa, ma Dia Tuhan Allah pung Ana ju. Dia ju Kristus, andia Orang yang Tuhan su janji memang ko mau kirim datang.
Andia ko Markus sonde carita so’al Yesus pung lahir, Dia pung bésar datang, Dia pung ruma, Dia pung orang tua, deng hal laen bagitu dong. Te ini bukan riwayat idop na!
Buku pung Tema apa?
Markus ulang-ulang pake tiga pangkat buat Yesus, ko kasi tunju, Yesus tu, bukan manusia biasa sa. Te Dia tu, andia:
1. | Tuhan Allah pung Ana | (1:11, 9:7, 15:39) |
2. | Kristus (Mesias) | (1:1, 8:29, dll)a |
3. | Manusia Tulen |
Dalam ini buku ni, Markus ada pake pangkat Manusia Tulen deng tiga cara. Andia:
· Manusia Tulen ada pung hak deng kuasa dari Tuhan Allah. (2:10,28)
· Orang bésar dong mau bekin susa sang Manusia Tulen, tola buang sang Dia, deng bunu bekin mati sang Dia. Ais Dia idop kambali. (8:31, 9:9,12,31, 10:33,45, 14:21,41)
· Manusia Tulen nanti datang kambali pake kuasa yang talalu hebat pung. (8:38, 13:26, 14:62)
Di satu sisi, Yesus jadi manusia yang sonde beda dari orang yang Dia mau kasi salamat dong (Ibrani 2:17). Ais, Dia tau mara (3:5, 10:14). Dia tau frustrasi (8:12,17-21). Dia heran (6:6a). Dia togor sang Petrus (8:33). Dia masparak sang orang, tagal dong sonde parcaya (9:19). Dia pung hati susa deng sonde tanáng (14:33-34). Dia jato kasian (1:41, 6:34, 8:1-3, 10:21).
Ma di sisi laen, Dia ada bawa kabar bae (1:14-15,34, 35-39). Dia ada pung kuasa ko bekin bae orang saki dong (1:32-34, 3:7-12, 5:24-34), usir setan dong (1:21-27, 5:1-20), hapus buang orang pung sala (2:1-12), bekin tadó angin ribut (4:35-41), deng kasi idop kambali orang mati (5:22-24,35-42). Dia mati, ma ais, Dia ju idop kambali (15:6-16:20).
1. | Yesus layani di Galilea deng
di tampa laen dong
|
1-10 | ||||||||||||
2. | Yesus di Yerusalem
|
11-16 |
a Ada satu pangkat lai, andia Raja Daud pung turunan (10:46-48, 12:35-37). Orang Yahudi samua tau, bilang, Raja Daud pung turunan tu, andia Kristus.