So'al Surat Filipi

Sources used (in descending order of significance): CEV intro, UBS Study notes, Uma BT, NLT Life Application Study Bible, The Message, The Source, SSA.

Kota Filipi tu, satu kota bésar di propinsi Makedonia. Kali partama Paulus maso pi Eropa tu, di Filipi. Di situ dia katumu deng mama Lidia, ju dia usir kasi kaluar setan dari satu nona, ais dong lempar kasi maso sang dia di bui. Tenga malam, ju dia deng Silas manyanyi ko angka puji sang Tuhan dalam bui. Abis tana goyang, bui pung kapala deng dia pung kelu ju parcaya sang Yesus (Utusan dong pung Carita 16).

Sapa yang tulis? Kapan? Di mana?

Surat Filipi sandiri bilang Paulus yang tulis ini surat (1:1) dari dalam bui (1:7,13,14,17). Iko orang yang pintar dong, Paulus tulis ini surat ni, kira-kira taon 61-62M. Iko gareja pung tradisi, Paulus tulis ini surat waktu pamarenta Roma tahan sang dia di kota Roma (Utusan dong pung Carita 28).

Lia ini tampa dong samua di petá dong di buku pung balakang.

Akurang ko Paulus tulis ini surat?

Waktu orang parcaya di kota Filipi dengar, bilang, Paulus ada dalam bui di Roma, ju dong minta Epafroditus bawa dong pung bantuan pi di dia. Tarima abis, Paulus tulis ini surat ko minta tarima kasi sang dong (4:10-20). Dia ju mau kasi kuat dong pung parcaya (1:3-11). Dia baharap ko Epafroditus bisa antar bawa ini surat pi di orang Filipi dong.

Buku pung Tema, apa?

Paulus minta ko orang Filipi dong idop satu hati ko biar orang sonde bisa lempar sala apa-apa sang dong. Deng bagitu, banya orang bisa parcaya sang Tuhan Yesus pung Kabar Bae (1:27-2:18; 4:2-3). Dia carita, bilang, dong kasi maso dia dalam bui, tagal dia rajin kasi tau orang so'al itu Kabar Bae. Biar bagitu, ma banya orang ada dengar itu Kabar Bae (1:12-26). Orang parcaya di Filipi musti ati-ati deng orang yang ajar sala deng idop babengko dong (3:1-2, 17-19).

Ma dia tulis paling banya, so'al orang pung hati yang sanáng deng tanáng, kalo dong ta'ika batúl deng Kristus (1:3-6; 2:17-18; 3:1; 4:1; 4:4; 4:6-8; 4:10-14).

Orang dong musti randá hati sama ke Yesus, ko jang sombong (2:1-11).

buku pung Susunan, karmana?

1.

Paulus buka dia pung surat

1:1-2

2.

Hati sanáng dalam susa

A.	Paulus sambayang kasi sang orang Filipi	1:3-11
B.	Biar dapa susa, ma kotong parcaya tarús	1:12-30

1:3-30

3.

Hati sanáng waktu layani orang

A.	Kotong musti randá hati, sama ke Yesus	2:1-11
B.	Pasang kaki ko idop lurus	2:12-18
C.	Timotius deng Epafroditus pung jasa	2:19-30

2:1-30

4.

Hati sanáng tagal parcaya sang Yesus

A.	Tuhan tarima orang tagal dong pung parcaya	3:1-11
B.	Pasang kaki ko iko Tuhan pung jalan	3:12-4:1

3:1-4:1

5.

Hati sanáng waktu bantu orang

A.	Tuhan mau kasi kuat kotong pung hati	4:2-9
B.	Paulus minta tarima kasi tagal dong bantu sang dia	4:10-20

4:2-20

6.

Paulus tutup dia pung surat

4:21-23