So'al Surat 2 Tesalonika

 

Sources used (in descending order of significance): UBS Study notes, Uma BT, NLT Life Application Study Bible, TNIV Study Bible, CEV intro, The Message, The Source, New Bible Dictionary.

Waktu Paulus dong kaluar dari kota Filipi, dong jalan tarús sampe di kota Tesalonika. Ais dong tenga di situ tiga minggu, ju ajar sang orang Yahudi so'al Tuhan Yesus. Saparu tarima dong pung omong, deng saparu sonde. Ada ju orang bukan Yahudi yang tarima ame dia pung omong. Ma orang Yahudi pung bos-bos tusu-tusu orang ko bekin kaco, sampe Paulus tarpaksa pi kota Berea, ais kota Atena. (Utusan dong pung Carita 16:38-17:15). Tagal dia sonde lama di Tesalonika, andia ko ada orang yang baru parcaya yang jadi bingung. Jadi, Paulus tulis surat 1 Tesalonika ko ajar tamba sang dong. Biar bagitu, ma ada yang masi bingung so'al Tuhan Yesus pung datang kambali. Andia ko abis barapa bulan sa ju Paulus tulis tamba ini surat 2 Tesalonika ni.

Sapa yang tulis? Kapan? Di mana?

Surat 2 Tesalonika sandiri bilang Paulus yang tulis ini surat (1:1; 3:17). Silas deng Timotius ju iko bantu (1:1). Iko orang yang pintar dong, Paulus dong tulis ini surat 2 Tesalonika ni, kira-kira taon 51-52M dari kota Korintus.

Lia ini tampa dong samua di petá dong di buku pung balakang.

Akurang ko Paulus tulis ini surat?

Orang parcaya di Tesalonika sonde tau, bilang, Tuhan Yesus pung datang kambali nanti jadi karmana (2:1-2). Saparu bilang Dia su datang kambali. Saparu sonde karjá lai, te dong bilang, sonde lama lai, te Tuhan Yesus su datang kambali (3:6,11-12).

Buku pung Tema, apa?

Paulus ada nasiat tiga macam sang orang parcaya di Tesalonika:

  1. Pasti dong dapa susa deng sangsara macam-macam tagal dong iko sang Tuhan Yesus. Ma dong musti batahan kuat dalam dong pung parcaya. Nanti Tuhan Allah yang kasi salamat sang dong, deng balas sang orang yang bekin jahat sang dong. (1:4-12; 2:13-15)
  2. Tuhan Yesus pung datang kambali nanti jadi karmana? (1:7-10; 2:1-12)
  3. Jang pamokol; deng jang idop dari orang laen pung karingat. (3:6-15)

Paulus ju tulis ayat mas so'al kotong pung idop waktu dapa susa, deng tunggu Yesus pung datang kambali, bilang, “Andia ko botong sambayang siang-malam kasi sang bosong, ko biar Tuhan Allah anggap bosong memang pantas jadi Dia pung orang. Botong ju minta ko Dia kasi Dia pung kuasa sang bosong, ko biar bosong bisa bekin samua yang bae iko apa yang bosong putus mau bekin, deng iko apa yang bosong parcaya. Kalo bosong idop deng cara bagitu, nanti orang dong angka nae tinggi-tinggi Tuhan Yesus pung nama. Deng bosong ju kaná puji, tagal bosong iko sang Dia. Ini samua nanti jadi, tagal kotong pung Allah Bapa, deng kotong pung Bos Yesus Kristus pung hati bae.” (1:11-12)

buku pung Susunan, karmana?

1. Paulus buka dia pung surat 1:1-2
2. Paulus minta tarima kasi,
tagal dong batahan dalam susa		 1:3-12
3. Ada kaco dolo, baru Tuhan Yesus datang kambali 2:1-12
4. Orang parcaya musti batahan kuat 2:13-17
5. Paulus minta ko dong sambayang kasi sang dia 3:1-5
6. Orang Parcaya jang pamokol 3:6-15
7. Paulus tutu dia pung surat 3:16-18