Taon 50-52M, Paulus ada layani kira-kira 18 bulan di kota Korintus (Utusan pung Carita 18:1-17). Ais ju, dari taon 52-55M dia pi layani di kota Efesus. Waktu di Efesus dia tulis surat 1 Korintus. Ais Titus yang antar bawa itu surat partama.
Surat 2 Korintus sandiri bilang Paulus yang tulis ini surat (1:1). Deng Timotius ju ada sama-sama deng dia.
Iko orang yang pintar dong, Paulus ada tulis ini surat 2 Korintus ni, kira-kira taon 55-57M. Sonde jalás dia tulis dari mana. Ada yang pikir dia tulis di propinsi Makedonia waktu Titus baru datang bawa kabar dari orang parcaya di Korintus (7:5-13). Ma ada hal-hal yang sonde bacocok deng itu pikiran. Ada ju orang yang pikir, bilang, Titus ju yang antar bawa ini surat pi kasi orang Korintus dong.
Lia ini tampa dong samua di petá dong di buku pung balakang.
Paulus tulis ini surat waktu dia pung hubungan deng orang parcaya di kota Korintus sonde bae. Orang di Korintus sonde batahan kuat dalam dong pung parcaya. Dong idop di satu tampa yang dia pung orang dong idop kamomos. Ju ada orang putar-balek dalam jama'at yang ajar sonde batúl, deng maen karitik sang Paulus, bilang, dia bukan Yesus pung utusan yang batúl. Andia ko dia bela dia pung diri. Ma Paulus ju kasi tunju, bilang, dia rindu cari jalan ko bisa babae kambali deng dong. Dia ju rasa syukur, tagal, biar dia omong karás sang dong, ma ada yang su tobat deng babae kambali deng dia (fasal 1-7).
Dia ju minta orang parcaya di Korintus ko dong bantu orang parcaya di Yerusalem deng di propinsi Yudea yang ada kaná susa. Waktu dia omong so'al bantuan, dia ju kasi ajaran so'al doi (fasal 8-9).
Di Korintus, ada yang omong kosong macam-macam ko mau angka diri jadi Yesus pung utusan. Dong ju omong mau kasi jato sang Paulus. Ais, Paulus hantam bale sang dong, deng pake omong sinis (fasal 10-13). Dia ju akal-akal mau angka diri jadi orang hebat sama ke dong. Padahal, dia cuma mau kasi tunju bukti, bilang, itu orang putar-balek dong sonde mangarti batúl Yesus pung hati bae kasi kotong samua.
Surat 2 Korintus mau bekin lurus masala di jama'at. Paulus kasi tunju taráng-taráng dia pung frustrasi deng orang parcaya di kota Korintus. Deng dia ju sonde malu kasi tunju dia pung hati babunga kasi sang dong, kalo dong bekin yang batúl (6:11-13; 7:2-16).
Paulus ju kasi ajaran so'al:
· Tuhan Allah pung janji yang baru, tagal Yesus (3:1-18)
· biar kotong rasa sonde kuat deng dapa susa sakarang, ma nanti Tuhan bekin kotong pung palayanan dapa hasil yang bae, deng Dia ju mau angka tinggi-tinggi sang kotong (4:1-15)
· kalo kotong idop kambali, kotong pung badan baru jadi ke karmana (4:16-5:10)
· bekin babae kambali hubungan yang su rusak (5:11-21)
· pamimpin yang bae (6:1-7:16)
· orang parcaya musti babantu (8:1-9:15)
Paulus tutu dia pung surat deng omong berkat manis kasi sang dong (13:13).
| 1. | Paulus buka dia pung surat | 1:1-11 |
| 2. | Paulus bela dia pung karjá waktu di Korintus dolu | 1:12-7:16 |
| 3. | Bantuan kasi orang susa di Yudea | 8:1-9:15 |
| 4. | Paulus bela dia pung hak jadi Yesus pung utusan | 10:1-13:10 |
| 5. | Paulus tutu dia pung surat | 13:11-13 |